Ángeles Huerta

Ángeles Huerta (Gijón, 1974) Formada na Met Film School de Londres, debuta na longametraxe co documental creativo Esquece Monelos (2017), onde un río soterrado e esquecido se converte no fío condutor para abordar os meandros personais e políticos da memoria. Esquece Monelos obtivo a Mención Especial do Xurado en Documenta Madrid, tres premios Mestre Mateo e foi finalista nos Premios Feroz 2018. Na Seminci de 2022 estrea a súa primeira película de ficción, O corpo aberto, adaptación dun relato gótico de Xosé Luís Méndez Ferrín sobre o ilusorio dos límites que nos definen. A película foi merecedora de 12 premios Mestre Mateo na edición do 2023, incluíndo mellor película, dirección e guión.